Menya invano y’insigamugani “Yigize icyangamibyizi (indaya)”

Iyo mvugo yabaye umugani , ivugirwa ku mukobwa wihaye guta iwabo akajya kubwerabwera , ku rurembo yihahisha , nibwo bavuga ngo “ umukobwa  wan aka igize icyangamibyizi !.”

Byadukanwe n’abakobwa bo mu Buganza (intara y’amajyepfo ) ahagana mu mwaka wa 1900.  Icyakora dukurikije uko u Rwanda rwahoze rukomeye ku busugi bw’abari barwo ,  nta wumva neza uko byaje kugenda kugira ngo abakobwa bigire ibyomanzi  mbere y’umwaduko w’abazungu mu Rwanda . Kuva ubwo byararangatanye  bigeza magingo aya , uretse ko basigaye  bavuga ngo “yabaye indaya”

Aba bakobwa  ku ngoma ya Rwabugiri barikoranije biyita ibyangamibyizi  banga guhingira  iwabo  no kubakorera indi mirimo . Bacikira ku rurembo bavuga ko  bagiye gushakira amata I bwami ( umukiro ) . Mbese ni nk’ibi by’abubu bashikira mu mijyi bitwaje ko bagiye gushaka akazi. Ubwo bari barihimbiye akaririmbo k’uruyundo rwabo   ngo “ aho kurwara ibikota byo ku ntoki ( amabavu ) nzarwara ibikota byo ku birenge ( ubunana) , nkurikiye inkotanyi I Rubengera .”

Nuko bamaze kwiyemeza gutyo bajya I Giseke na Nyagisenyi mu rugo rwa Rwogera rwahozemo Murorunkwere nyina wa Rwabugiri. Bagenda bahabuwe   n’umutwe w’intore za Rwabugiri , wari umaze kuremwa witwaga Ingangurarugo,  zari  ziruyobowemo rumaze kwegurirwa Kanjogera muka Rwabugiri , nyina wa Musinga . Abahungu babonye  urwo rushashi rubasesekayemo bati “ Murakaza mboga zizanye “  ni abahungu bawe rero bamwe bo ku rurembo ! babiraramo babahunda impu nziza zimwe  z’imikane  batashoboraga kwibonera iwabo. Dore ko ubundi abakobwa rubanda rusanzwe bambaraga  ibishongero by’ibinyita. 

Nuko abo bahungasuka basa n’abisanze mbese baba banyamugwahashashe ,  kuko uko guhunga isuka byari birimo n’umururumba wo kwambara neza. Ariko uburyo bwa kubigeraho bukaba bumwe : ubusambanyi. Barabyiyemeza , birakorwa biravugwa  ubwarare bwabyo busakara  u Busanza busingira I Nduga yose irorama.  Birarambanya bigeze ku ngoma ya Musinga  birasizora abakobwa  barahurura bikubira I Nyanza , ariko noneho biyita inyangakurushwa . Ariko umugambi ukaba umwe : Ukaba uwo gushakisha imyambaro y’akarusho ubusambanyi.  Bibaho rubura gica bigejeje mu mwaka wa 1927 ubusambanyi buba akarorero ; I Kigali hari hamaze gukomera habaye I buzungu . Abakobwa bamwe bohoka mu bayisiramu , abandi borama mu baboyi.  Ubwo iryo hururu ryari rikabuwe n’umugore w’umurerakazi Nyirakayondo , yari mushiki wa Rukara   rwa Bishingwe , afitwe n’umuzungu witwaga Rongorongo ( Administrateur Borgers ).  Nibwo hadutse akagani mu Rwanda ngo  “umuceri muca iwabo ! isukari isuka buzungu’’

   Nuko Kigali iba yakiriye Nyanza . Bigejeje mu mwaka wa 1932, umuzungu bitaga Busambira Adiminisitarateri Schmith (soma Shimiti) yubaka ikirorero ( urusisiro bitaga iturubaki ) akigira icumbi iy’abatware n’ibisonga n’abakarani igihe baje ku itriki ( umunsi w’umurarikano) . bwana rezida we yubakisha ikindi kirorero   cy’abapolisi bitaga abavurugaji (Brigadiers). Ubwo abaplosi n’abakarani bari abasore gusa; ndetse n’ibisonga ari uko, kuko hari hamaze kugabana abazi kwandika basa , ba se bamaze kwegura cyangwa kunyagwa. Ubwo noneho abakobwa b’ibyomanzi b’impande zose barisukiranya bahururiye kwambara amasengeri , niho yari acyaduka. Nibwo bahimbiyeho imbyino yatangiraga ngo : ni nde wagaramiye isengeri imwe, abandi bagaramira magana ane ?   uwo ni cya kimamara cyo kwa naka…!’’

Iryo zina ry’ibyomanzi by’I Nyarugenge na ryo nyuma ryakuwe  n’iry’indaya , ku gahararo cy’inzaduka kakomotse ku bahungu b’ibirumbo byajyaga Bugande , bagerayo bati “ Hehe kandi n’u Rwanda ! : Abo bitwaga  « indaya za Bugande.» hanyuma abakobwa barariharara by’urwiganwa , batangira kuritenjyenjya bitwa « maraya »  aho bigeze  barerura bararikurana aba ari bi bitwa indaya ; nizo ndaya ubu za kabwera , ku mpamvu y’uko zihora zibwerabwera mu rubuga rw’abahungu bo ku rurembo aho uri hose. Naho abahungu b’ibiraramisagara  basigara bitwa «amabandi  »

Abakobwa rero , ari  abigize indaya za kabwera , ari abigize ibyomanzi by’I Nyarugenege , ari n’abigize inyangakurushwa z’I Nyanza , bose ni bamwe n’aba mbere bo mu Busanza biyise Ibyangamibyizi . Ni cyo gituma iyo bumvise umukobwa watombotse akajya kwipendeza ku rurembo ( mu mujyi )  bavuga ngo  « yigize icyangamibyizi !  »  kera uwo , bene abo b’ibyangamibyizi bitwaga na  ba  « Nyirakadeheri »

Kwigira icyangamibyizi = kuba kabwera : indaya