Ruhango: umuturage yabyutse asanga ku muryango we hari GRENADE

Mu mudugudu wa Nyakabungo, Akagari ka Karama Umurenge wa Ntongwe mu karere ka Ruhango umuturage witwa Muhigirwa Wellars yabyutse mu gitondo cyo kuri uyu wa kabiri asanga ku muryango we hari grenade. Kugeza ubu ntiharamenyekana abayihashyize.

Muhigirwa yabwiye Umuseke dukesha iyi nkuru ko  ejo nimugoroba yari yatanze ikiganiro ku kagari kabo mu bitangwa muri ibi bihe byo kwibuka. Akavuga ko akeka ko yenda hari abo bitashimishije akaba ari bo bakoze ibi.

Yavuze ko uyu munsi yabyutse maze ahagana saa kumi n’ebyiri za mugitondo asohotse agana ku irembo asanga munsi y’urugi rwo ku irembo hari grenade. Yahise atabaza ubuyobozi n’abashinzwe umutekano barahagera.

Umwaka ushize mu gihe nk’iki cyo kwibuka Muhigirwa avuga ko nabwo yabyutse agasanga mu mbuga y’iwe bahashyize umusaraba.

Uyu muturage avuga ko ibi abibona nk’iterabwoba no kumwereka ko nubwo yarokotse Jenoside bashobora kumwica.

Nemeyimana Jean Bosco Umunyamabanga nshigwabikorwa wʻUmurenge wa Ntogwe yabwiye Umuseke kandi  ko bari gukora iperereza bafatanyije nʻinzego zʻumutekano ngo bamenye uwahashyize iyo grenade ku muryango kwa Muhigirwa.

Ati “Ni grenage ishaje ubona ko imaze igihe kinini, turacyategereshe ko abayivanaho ngo  bayikureho”

Avugako ikigikorwa ari iterabwoba ariko batahita bagihuza nʻibihe byo kwibuka kuko bataramenya uwayihashyize n’icyabimuteye.

Src : Umuseke.rw