The Ben yasinyiye kwamamaza ikigo mpuzamahanga gikomeye.

The Ben umaze kwamamara mu Rwanda no mu mahanga yasinye amasezerano y’imikoranire n’ikigo cyo mu bufaransa Luc Belaire cyamamaye mu gukora inzoga z’igiciro.

Ni amahirwe akomeye mu kazi k’uyu muhanzi kuko yiyongereye ku bahanzi bakomeye ku isi barimo  Rick Ross, Dj Khaled, Diamond Platnumz .

The Ben yavuze ko amasezerano basinyanye azamara igihe cy’umwaka, ariko bakazakorana amezi atandatu ubundi akongera gusinywa bundi bushya. Ibijyanye n’ikiguzi cy’amafaranga bamuhaye yavuze ko ari ibanga ryemeranyijwe n’impande zombi.

Yagize ati “Ndanezerewe kuba Luc Belaire na QA bambonyemo icyizere, tumaze igihe kingana n’umwaka urenga turi mu biganiro by’uburyo twakorana. Uyu munsi rero ndanezerewe kuba twageze kuri uyu mwanzuro wo kuba twakorana kandi ndareba imbere heza no gukora akazi keza kabo na bo bagakora inshingano zabo ku iterambere rya The Ben.”

Yongeyeho ko nubwo asanzwe aba muri Leta Zunze Ubumwe za Amerika aya masezerano azajya amusaba kugaruka no mu karere ariko ku bw’ikoranabuhanga afite icyizere ko aho azajya aba ari hose kuhaba bitazamubera intambamyi.

Yakomeje agira ati “Ikizagira akamaro mu gukorana na bo ni uko hari amahirwe ko n’iyo ntakorana n’abahanzi bayirimo ariko mu buryo bumwe cyangwa ubundi hashobora kubaho inzira zatuma habaho ubwo bumwe bwo kumenyana gushobora kubyara igikorwa runaka, bazajya banyuza amafoto yanjye ku mbuga nkoranyambaga zabo zikomeye kandi zikurikiranwa n’abahanzi bakomeye ku Isi, byose ubwabyo byafungura inzira za The Ben mu muziki.”

The ben abaye umuhanzi nyarwanda wa mbere usinye amasezerano n’ikigo mpuzamahanga gikomeye  ; akaba ari n’umwe mu bakunzwe cyane kubera ijwi ryiza no kwandika indirimbo neza.

Inzoga za Belaire Then Ben agiye kujya yamamaza

photos: Igihe