Akamaro ko kurya urusenda mu buzima bwa muntu

Nyuma yo kumva abantu banyuranye bajya impaka niba kurya urusenda hari icyo byaba bimaze,  no gusanga hari abantu besnh barurya ari ukurukunda gusa batazi cyangwa ngo batekereze ku kamaro urusenda rwagira, twabateguriye iyi nkuru kugira ngo abantu bamenye umumaro ukomeye wo kurya urusenda mu buzima bwa muntu.

·         Urusenda rugisarurwa yaba ari urw’icyatsi cg rutukura, ni imvano ikomeye cyane ya vitamin C. Iyi vitamin ikaba ingenzi cyane mu mikorere y’umubiri, yitabazwa mu gukora collagen; poroteyine y’ingenzi mu gusana umubiri, udutsi tw’amaraso, uruhu, ingingo ndetse n’amagufa. Guhora urya buri munsi ifunguro rikize kuri vitamin C birinda indwara zitandukanye za infections zishobora kwibasira umubiri (kuko vitamin C yongerera umubiri ubudahangarwa), kubyimbirwa n’indwara yo kubura vitamin C (scurvy/scorbut) igaragazwa no kuva amaraso mu menyo cg kugaruka kw’ibisebe byari byarakize.

·         Ikinyabutabire twavuze, capsaicin n’izindi alkaloid zirimo, ubushakashatsi bwerekanye ko zifite ubushobozi bwo kurwanya bagiteri, kurwanya kanseri, kurwanya diyabete no gukuraho uburibwe, ikindi bwagaragaje ko bugabanya urugero rwa cholesterol mbi mu bantu babyibushye biringaniye.

·         Urusenda rubamo ibinyabutabire bitandukanye bizwiho guhashya no kurwanya indwara zitandukanye no gutuma umubiri umererwa neza muri rusange. Capsaicin n’ibindi biyigize bikoreshwa mu gukora amavuta naza pomades zikoreshwa mu kurinda uburibwe, kubabara imitsi n’ingingo

·         Ni isoko nziza ya vitamin A n’izindi flavonoids nka beta-carotene, alpha carotene, lutein, zea-xanthin na cryptoxanthin, ibi byose biri mu rusenda bifasha umubiri kuwurinda uburozi butandukanye n’ibindi byose bishobora kuwangiza mu gihe urwaye indwara zikomeye cg stress

·         Urusenda ni isoko nziza ya vitamin B zitandukanye harimo: B1 (thiamine), B2 (riboflavin), B3 (niacin) na B6 (pyridoxine). Zifasha mu mikorere y’umubiri itandukanye; nko kurinda imikorere mibi y’imitsi, mu gutunganya poroteyine no gukorwa kw’imisemburo.

·         Urusenda rwifitiye imyunyungugu myinshi nka: potasiyumu, ubutare na manyesiyumu. Potasiyumu ni ingenzi cyane ku mikorere y’uturemangingo n’amatembabuzi afasha mu miterere y’umutima n’umuvuduko w’amaraso. Ubutare nabwo bufasha mu ikorwa ry’amaraso

Capsaicin iyo ihuye n’ururenda rwo mu kanwa, mu muhogo cg mu gifu ushobora kumva umeze nk’uri gushya, ibi ushobora kubivura unywa amata akonje cg se yogurt (yawurute); afasha mu kugabanya bwa buribwe binyuze mu kugabanya igipimo cya capsaicin muri rwa rurenda, ashobora no kurinda ko bihura.