Rutsiro: umuganga yabyaje umugore yateye inda mu rugo iwe amupfiraho

Mu murenge wa Ruhango mu kagali ka Gihira umugore ukiri muto watewe inda n’umuganga maze yageza igihe cyo kubyara uyu muganga akamujyana iwe mu rugo ngo amubyaze ariko uyu mubyeyi  arava kugeza apfuye, muganga nawe ahita ahunga.

Uyu wapfuye abyarira ahatari ho ni uwitwa Marie Claire Uwineza, inda imufashe yari yabanje kujya ku kigo nderabuzima cya Bitenga aho umuganga bivugwa ko wamuteye inda akorera.

Uyu muganga witwa ‘Faustin’ ngo yahise asaba uyu mugore ko bajya iwe akamubyarizayo, nyuma yo kubyara ariko ngo yavuye amaraso kugeza ashizemo umwuka.

Uwineza yatewe inda ya mbere akiri umwangavu arabyara, iyi yari inda ya kabiri atwite.

Umwe mu bavandimwe ba Uwineza yabwiye Umuseke ko bibabaje kubona umuganga afata iwe akahahindura aho kubyarira.

Abonye uyu mukobwa apfuye, uyu muganga yahise atoroka kugeza ubu nta uzi irengero rye.

Uwiziyimana Vestine Umuyobozi w’ikigo nderabuzima cya Bitenga aho uyu muganga akora yabwiye Umuseke dukesha iyi nkuru ko ibi byabayeho koko ariko nta byinshi yabitangazaho.

Ati “ibyo koko byarabaye ariko ukeneye andi makuru wabaza izindi nzego zisumbuyeho kuko biracyari mu iperereza”.

Rutayisire Deo umunyamabanga nshingwabikorwa w’umurenge wa ruhango yatangarije umuseke dukesha iyi nkuru ko umuganga yabyaje uwineza bikamuviramo urupfu yagerageje gusibanganya ibimenyetso . icyatumwe bamukeka ngo ni uko yahise atoroka abonye umukobwa apfuye.

Uwineza watewe inda akiri umwangavu asigiye nyina umubyara abana babiri harimo nuwo yapfuye amaze kubyara.

Src: umuseke.rw