Christopher agiye gusimbuzwa muri Kina Music bitarenze amezi 2

Inzu itunganya umuziki ikanamenyekanisha ibikorwa by’abahanzi bayikoreramo izwi nka Kina Music igiye gutangiza amarushanwa yo gushaka uzasimbura umuhanzi Christopher umaze imyaka ibiri arangije amasezerano yari afitanye n’iyi label.

Christopher yinjiye muri Kina Music muri 2009 ubwo yatsindaga amarushanwa yo gushaka umuhanzi wagombaga gukorana n’iyi label.

Aya marushanwa yari yitabiriwe n’abahanzi batandukanye barimo Derek uririmba mu itsinda rya Active, n’umunyamideri Kate Bashabe ubu wabaye rwiyemezamirimo mu bucuruzi.

Muri 2016  Christopher yavaye muri Kina Music arangije amasezerano, iyi Label yatangaje ko izongera igakora amarushanwa yo gushaka undi muhanzi igomba gufasha agasimbura Christopher.

Ishimwe Clement uyobora Kina Music yabwiye Umuseke  dukesha iyi nkuru  ko aya marushanwa ari ayo gushaka undi muhanzi ufite impano bagomba gufasha mu kumuzamura, ngo aya marushanwa bazayatangira bitarenze Werurwe.

Ati “Ubu twamaze kwemeza ko irushanwa rizaba uyu mwaka, ukwezi kwa Mata 2018 kuzajya gutangira twaramaze kubona umwe mu bahanzi tuzafasha ariko ubu ntabwo nakubwira italiki bizaberaho.”

Iri rushanwa rizabera mu mugi wa Kigali, gusa ngo n’abo mu ntara imiryango irafunguye kandi kwiyandikisha ni Ubuntu.

Ku munsi wa mbere w’irushanwa bazafata abahanzi batanu, nyuma bakazahitamo umwe ugomba kuzasinya amasezerano n’iyi Lebel azamara imyaka itatu.