Philip Amoateng wayoboraga Tigo yagizwe Umuyobozi mukuru wa Airtel Rwanda

Nyuma y’uko Urwego Ngenzuramikorere (RURA) rwemeje ko sosiyete y’itumanaho ya Airtel yaguze 100% imigabane ya Tigo Rwanda , Philip Amoateng   wari usanze ayobora Togo Rwanda ni we wagizwe Umuyobozi Mukuru wayo  Airtel Rwanda .

Mu mpera z’umwaka ushize ni bwo Bharti Airtel ibarizwamo Airtel Rwanda yatangaje ko yaguze imigabane yose ya Sosiyete y’Itumanaho ya Tigo Rwanda ibarizwa muri Millicom International Cellular SA.

Aya masezerano yavugaga ko Tigo Rwanda izagurwa amafaranga yikubye inshuro esheshatu ayo yinjije ukuyemo inyungu, imisoro, guta agaciro kw’ifaranga ndetse n’ayishyuwe ibindi bintu, akazishyurwa mu gihe cy’imyaka ibiri.

Ku wa 23 Mutarama 2018, ni bwo RURA yatangaje ko guverinoma yemeje ishyirwa mu bikorwa ry’ihererekanya ry’imigabane nk’uko byemeranyijweho n’ibigo byombi, bishyirwa mu bikorwa kuwa 30 Mutarama.

Mu itangazo rigenewe itangazamakuru Airtel Rwanda yashyize ahagaragara kuri uyu wa Kabiri, yatangaje ko Philip Amoateng wari usanzwe ayobora Tigo, yagizwe Umuyobozi Mukuru w’Ikigo ziriya sosiyete z’itumanaho zombi zahuriyemo.

Muri Gicurasi 2016, Amoateng wize muri kaminuza ya Leicester mu Bwongereza yahawe kuyobora Tigo Rwanda, umwanya yagumyeho kugeza ubwo iki kigo cyagurwaga na Airtel Rwanda.

Yari asanzwe afite uburambe bw’imyaka 16 muri Millicom aho yagiye akora imirimo itandukanye, uretse kuba umuyobozi mukuru wa Tigo Rwanda, akaba yaranabaye n’umuyobozi ushinzwe imari muri iki kigo mu gihe cy’imyaka ine.

Ubwo byatangazwaga ko Airtel igiye kugura Tigo, Amoateng yavuze ko bifite inyungu nyinshi ku Banyarwanda zirimo gukemuka kw’ibibazo byo guhamagara ahantu hose mu gihugu ndetse no mu mahanga.

Yagize ati “Dufite umugabane mwiza ku isoko ry’itumanaho, twageraga hafi ya hose mu Rwanda, dufite internet ya 3G na 4G ikora neza n’iminara irenga 530, nihuzwa n’iya Airtel irenga 490, mu gihugu hazaba hari iminara igera ku 1000, bityo inzitizi mu guhamagara ziveho.”

Yongeyeho ko nyuma yo guhuza ibigo byombi nta kizahinduka ku bijyanye na nimero umuntu yakoreshaga, ikizabaho ari ukubihuza mu buryo bw’ikoranabuhanga serivisi zose abakiliya ba Tigo babonaga bagakomeza kuzibona ariko mu kigo gishya.

 Nyuma y’uko Airtel iguze imigabane yose ya Tigo Rwanda yahise iba sosiyete ya mbere ifite abafatabuguzii besnhi kuko yahise irusha MTN Rwanda abarenga miliyoni. Kuko tugendeye ku mibare yatangajwe na RURA umwaka ushize Tigo yari ifite abafatabuguzi 3,252,765,   Airtel ifite abakiriya 1,586,018,  MTN ifite abakiriya  3,520,315 , Airtel ihita inagira iminara isaga 1000 mu gihugu hose.

Phillip Amoateng umuyobozi mushya wa Airtel Rwanda