Ingaruka tutakekaga kurya inyama nyinshi byagira ku buzima

Kubera urukundo abantu tuzigirira, zihabwa amazina menshi imbonekarimwe, akaboga n’ayandi, abantu bakazikunda kuzirya mu birori nk’ibiryo biruta ibindi.  inyama zitukura zigira ingaruka zitandukanye ku buzima nk’uko ubushakashatsi butandukanye bugaragaza ko iyo ziriwe ku bwinshi mu bihe bitandukanye bishobora kugira ingaruka zitandukanye ku muntu. 

Ubushakashatsi bwakozwe n’impuguke zo muri Kaminuza ya Harvard School of Public Health muri Leta zunze z’Amerika bugaragaza ko inyama zitukura zahinduwe (la viande transformée) atari zo zigira ingaruka ku buzima gusa, kuko n’izidahinduye zigira ingaruka.

Abashakashatsi batandukanye bagaragaza ko kurya inyama ku buryo burengeje urugero bigira ingaruka ku buzima bw’umuntu.

Zimwe muri izo ngaruka zirimo kuribwa mu ngingo, kurwara indwara zitandukanye zirimo kanseri n’izindi.

Ikigo cy’Abanyamerika gikora ubushakashatsi ku ndwara ya Kanseri "American Institute for Cancer Research" cyatangaje ko kurya inyama zitukura nyinshi bishobora gukururira umuntu kanseri harimo nk’ifata mu mara, mu muhogo, ibihaha, urwagashya, no mu myanya myibarukiro y’abagore.

Ibi biri muri raporo yabo bise "Food, Nutrition, Physical Activity, and the Prevention of Cancer: a Global Perspective" aho bagaragaza ko inyama zitukura kandi zishobora kuba intandaro y’uburwayi bw’umutima n’indwara zifata imiyoboro y’amaraso, tutibagiwe diyabete yo mu bwoko bwa kabiri.

Bakomeza bavuga ko umuntu muzima, (udafite ikibazo na kimwe cy’uburwayi mu mubiri we) byaba byiza ariye munsi ya garama 500 cyangwa inusu (1/2kg) cy’inyama zitukura mu cyumweru.

Barangiza bavuga ko umuntu ukora siporo umubiri we ishobora kwihanganira izi ngaruka kurusha umuntu utayikora. ibyaba byiza umuntu yakwita ku kigero cy'inyama arya buri munsi , akazigabanya aho biri ngombwa kuko , ubuzima  ari impano ikomeye, itakara ntitorwe.