Umuririmbyi w’Umunya-Nigeria David Adedeji Adeleke AKA Davido ubwo aheruka mu Rwanda yabwiye abanyamakuru ko Jay Polly ari we muhanzi w’Umunyarwanda azi, biza no gushimangirwa no kuba bararirimbanye mu gitaramo yakoreye kuri stade Amahoro. Jay Polly yaciye amarenga ko ari gukorana indirimbo n’uyu muhanzi wo muri Nigeria, gusa ngo yagiye batayirangije.
Mbere y’uko kiriya gitaramo kiba, Jay Polly na Davido barahuye bemeranya gukorana indirimbo no kuzahurira ku rubyiniro (ibi byo byarabaye).
Byari biteganyijwe ko nyuma y’igitaramo bazajya muri Studio bagakora iyo ndirimbo bagafata n’amashusho yayo kugira ngo Davido akomeze ibikorwa by’ibitaramo ari gukorera muri Africa.
Ku munsi bagombaga gukoreraho iyi ndirimbo, Davido ntiyabonetse, amakuru avuga ko yari akinaniwe kuko yavuganye na Jay Polly akamusaba kujya muri studio akaririmba ibitero bye, naho we akaza kuba aririmba ibye nyuma amaze kuruhuka.
Iyo ndirimbo bari bise “I beg you” yari iriho itunganywa na Pastor P. mu buryo bw’amajwi mu gihe Fayzo yari yiteguye guhita afata amashusho.
Fayzo yabwiye Umuseke ko yari yamaze kwegeranya ibikoresho byose ngo icyari gisigaye kwari ukuza kwa Davido gusa.
Ngo uwo munsi warinze urangira umuhanzi Davido atabonetse kugeza igihe yaviriye mu Rwanda ubwo yerekezaga muri Repubulika Iharanira Demokarasi ya Congo.
Jay Polly avuga ko atajya kureba Davido muri Congo kuko aba ahuze cyane muri ibi bitaramo ahubwo ko azamusanga i Lagos muri Nigeria ubwo azaba yarahugutse kugira ngo barangize iyi ndirimbo.
Src: Umuseke
No comments:
Post a Comment