Uganda : Dj yapfiriye mu gitaramo ari mu kazi

Umusore wakoraga akazi ko kuvanga imiziki yapfiriye bitunguranye mu gitaramo ari mu kazi, maze ibyari ibyishimo bikomeye bihinduka amarira  n’agahinda.

Nk’uko bitangazwa n’ikinyamakuru Chimpreports , Ibi byabereye mu gitaramo cyateguwe mu kabyiniro mu Mujyi wa Mubende muri Uganda mu ijoro ryo kuwa Kane tariki ya 8 Werurwe 2018.

Dj uzwi cyane mu Karere ka Mubende witwa Gonzaga Lubwama yapfiriye imbere y’abafana ubwo yari mu kazi ko kubasusurutsa ku munsi mpuzamahanga wahariwe abagore.

Polisi yo muri aka gace yatangaje ko Dj Gonzaga yageze muri aka kabyiniro mu masaha asatira saa saba z’igicuku ariko ngo mbere yo gutangira akazi yabanje kubwira inshuti ze ko yumvaga atamerewe neza.

Itangazo ryashyizwe hanze rigira riti “Nyakwigendera yageze muri aka kabyiniro hafi saa saba z’ijoro ariko yaje avuga ko atamerewe neza. Yahise yicara mu ntebe atangira kumererwa nabi nyuma yaje gupfa.”

Uyu musore amaze gupfa polisi ya Uganda muri aka gace yarahageze ikora iperereza ndetse umurambo wa nyakwigendera uhita ujyanwa mu bitaro bya Mityana. Uyu musore yapfiriye mu kabari k’umucuruzi ukomeye witwa Chrystom Wamala uri mu bakomeye muri Mubende.

 src : chimpreport