Musanze : Umusirikare yirashe arapfa

Umusirikare witwa  Rukara  Olivier mu ijoro ryo kuri uyu wa kane yirashe mu buryo bwo kwiyahura akoresheje imbunda y’akazi ahita apfa bikekwa ko byaba byaratewe n’amakimbirane yari afitanye n’umugore we.

Sergent Rukara Olivier alias Kigingi ari mu basirikare baheruka mu butumwa bw’amahoro, abaturanyi be bavuga yari yaje iwe mu karuhuko.

Abaturanyi be babwiye Umuseke dukesha iyi nkuru  ko uyu musirikare ngo avuye mu butumwa bw’amahoro bamubwiye imyitwarire mibi y’ubusinzi n’ubusambanyi bw’umugore yasize akababara cyane.

Umugore we bari barashyingiranwe amusanganye abana batatu yaratandukanye n’umugabo we wa mbere, ashakana na Kigingi ari umusore bubaka mu murenge wa Busogo kuri centre ya Byangabo mu karere ka Musanze babyarana abana babiri.

Umwe mu baturanyi babo yabwiye Umuseke ko amakuru yo kwiyahura kwa Kigingi bayamenye nijoro cyane umugore we atabaje.

Umwe mu bayobozi ba Rukara mu kazi utifuje gutangazwa, yabwiye Umuseke ko Kigingi koko yiyahuye yirashe umurambo we ugahita ujyanwa ku bitaro bya Ruhengeri.

Umuvugizi wa Police mu Ntara y’Amajyaruguru yahamirije Umuseke amakuru yo kwiyahura k’uyu musirikare.

Abaturanyi be bavuga ko mbere y’uko Kigingi ajya mu butumwa bw’amahoro yari afitanye amakimbirane n’umugore we ashingiye ku myitwarire.