Umugore uri mu mihango ashobora gukora imibonano mpuzabitsina

Kuri bamwe mu bashakanye, imihango y’umugore ya buri kwezi bayifata nk’ubusembwa butuma badakora imibonano mpuzabitsina, inzobere mu kuvura indwara z’abagore zo zivuga ko imihango idakwiye kuba inzitizi igihe bombi bashaka guhuza urugwiro.

Ku bagore bamwe iyo bari mu mihango bagira ububabare mu kiziba cy’inda, ndetse hari n’abarwara umutwe bakagira isesemi n’ubundi bubabare butandukanye, ariko kandi imihango ngo ntiyabuza umugore n’umugabo gukora imibabono mpuzabitsina igihe bombi babikeneye, kuko imihango y’abagore atari uburwayi bwandura.

Urubuga rwa esanté dukesha iyi nkuru, ruvuga ko bamwe mu bagore banga gukora imibonano mpuzabitsina muri iki gihe, mu gihe abandi ubushake bwo kuyikora buba bwiyongereye.

Ku ruhande rw’abagabo hari abavuga ko kwifata iminsi isaga itatu umugore amara mu mihango bibagora, bityo bagahitamo gukora iki gikorwa.

Nk’uko bakomeza babivuga ngo imihango ntikwiye kubuza abashakanye gukora imibonano mpuzabitsina, dore ko igihe igitsina cy’umugabo kinjiye mu cy’umugore amaraso ahagarara gusohoka.

Ariko kandi ngo igihe umugore ari mu mihango, iyo afite arwaye indwara zandurira mu mibonano mpuzabtsina, byoroha kwanduza uwo bashakanye kuruta igihe atari mu mihango.

Ibi bituma baboneraho gusaba abashakanye igihe batazi uko ubuzima bwabo bwifashe, gukoresha agakingirizo muri icyo gihe.

Ikindi kandi ngo mu gihe cy’imihango y’umugore , umwe mu bashakanye aba akwiye kubaha icyifuzo cya mugenzi cyo gukora cyangwa kudakora imibonano mpuzabitsina.