Wizkid yananiye umubyeyi we umusaba kubana n'umugore umwe

Wizkid yahishuye uburyo butangaje ababyeyi be batahuye ko yibarutse umwana wa gatatu ku bagore batandukanye, ibintu atumvikanaho na nyina ushaka ko ahitamo umwe uhamye.

Ibi Wizkid yabitangaje mu kiganiro cyihariye yakoranye na na Beat FM ikorera mu Mujyi wa Lagos. Yabajijwe uko ababyeyi be yabamenyesheje iby’umwana wa gatatu yibarutse asubiza ko babimenye babisomye ku mbuga nkoranyambaga.

Yongeyeho ko nyina umubyara ashaka ko ashinga urugo akarongora umugore umwe uhamye nubwo we ibyo atabikozwa ahubwo yifuza gukomeza kubyarana n’abagore batandukanye.

Yagize ati “Ikindi gitangaje ni iki cya nyuma, ababyeyi banjye ibyo babimenyeye ku mbuga nkoranyambaga. Mama umbyara arashaka ko nubaka urugo, ngafata umugore umwe ndetse tukagira abana ariko mfite imyaka 27 y’amavuko.”

Wizkid umaze kugira abana batatu yatangaje ko adateganya guhagarika kubyarana n’abagore akunda mu gihe cya vuba kuko ubu noneho yifuza kubona n’umukobwa.

Yagize ati “Ubu mfite abana batatu, abahungu batatu beza kandi nkunda cyane. Ubu ndashaka umukobwa.”

Wizkid ahamya ko atiyumvamo ibyo kubana n’umugore we kuko afite benshi akunda kandi na bo bakaba babizi neza ndetse bakabyakira. Abajijwe niba hari igihe kizagera agatoranya umugore umwe bazabana akaramata yasubije ati “Ibyo bizankomerera cyane rwose kuko njye mfite abagore benshi bari hafi cyane y’umutima wanjye.”

Abana batatu ba Wizkid bavutse ku bagore batandukanye mu myaka itandatu ishize ari bo Sola Ogudugu, Binta Diallo n’umujyanama we muri Leta Zunze Ubumwe za Amerika Jada Pollock wibarutse mu mpera z’umwaka ushize.

Src :  Igihe