Umugore wa Chameleone uherutse kwifotoza yambaye ubusa yibarutse

Daniella Atim Mayanaja umugore wa Chameleone, yibarutse umukobwa nyuma y’iminsi mike ishize yifotoje yambaye ubusa mu kwereka abamukurikira ko yari akuriwe.

Daniella Atim amaze iminsi hafi ukwezi mu Mujyi wa London mu Bwongereza, akiva muri Uganda byatangajwe ko yagiye kubyarirayo gusa umugabo we yabanje kubihakana.

Mu gitondo cyo kuri uyu wa Kane tariki ya 5 Mata 2018 nibwo Jose Chameleone yanditse ku mbuga nkoranyambaga akoresha ashimira Imana n’abantu bose babaye hafi y’umugore we haba mu kumusengera no kumufasha mu buryo bwose.

Yagize ati “Nimurebe icyo Imana yankoreye, Xara Amani Mayanja yinjiye muri twe uyu munsi mu gitondo ahagana saa moya n’iminota 44. Ndagushimiye cyane Atim ku bwo kwihangana no kunkunda ariko hejuru ya byose ndagushimira ko wampaye ibyishimo umugore agomba guha umugabo we.”

Daniella na Jose Chameleone[ukunzwe muri iyi minsi mu ndirimbo Champion] basanzwe bafitanye abana bane, uwo bitegura ni uwa gatanu azaza asanga Abba Marcus Mayanja, Amma Christian Mayanja, Alba Shyne Mayanja na Alfa Joseph Mayanja.

Amafoto ya Daniella yambaye ubusa yagiye hanze tariki ya 20 Werurwe 2018; yafashwe n’Umunyamerikakazi witwa Avalon usanzwe ukorera mu Bwongereza mu gihe uwamusize amarangi yiganjemo ayo muri Afurika ari uwitwa Ciara.

Daniella agiye kwibaruka umwana wa gatanu nyuma y’igihe gishize agiranye ibibazo na Chameleone byaje kuvamo gusaba gatanya ariko nyuma y’igihe gito bariyunze ibintu bisubira mu buryo.

Mu kirego cye, Daniella yagaragazaga ko mu myaka ine ishize Chameleone yagiye amutoteza kenshi ndetse ngo ntiyatinyaga no kumwuka inabi mu maso y’abana babyaranye.

Chameleone na Daniella bamaranye imyaka icumi, bakoze ubukwe bw’agatangaza mu 2007. Mu guhamya isezerano ryabo imbere y’Imana, basezeranyijwe na Padiri John Scalabrini [nyirarume wa Daniella, uyu musaza yitabye Imana mu Ukwakira 2016].

Amafoto yagaragazaga ko umugore wa Chameleone akuriwe